७२ वर्ष पछि दैलेखले पायो पहिलो केन्द्रिय सदस्य

दैलेख  :  नेपाली काँग्रेसको १४ औँ महाधिवेशनबाट दैलेखले पहिलो पटक केन्द्रीय सदस्य पाएको छ । नेपाली काँग्रेसको ७२ वर्षे इतिहास मै पहिलो पटक दैलेखको प्रतिनिधित्व गर्दै केन्द्रीय सदस्य आदीबासी जनजाती महिलातर्फ सीता कुमारी राना निर्वाचित भएपछि दैलेखले पहिलो पटक केन्द्रिय सदस्य पाएको हो ।

नेपाली काँग्रेसको १४ औँ सम्पन्न महाधिवेशनबाट आदीबासी जनजाती महिला केन्द्रीय सदस्यतर्फ चुनावी प्रतिश्पर्धामार्फत राना निर्वाचित भएकी छिन । आदीबासी जनजाती महिला केन्द्रीय सदस्यतर्फ ७ पदका लागि ३३ जना चुनावी प्रतिश्पर्धामा थिए । रानाले एक हजार ८ सय २६ मतसहित जीत हात पारेकी छिन । काँग्रेस सभापति शेरबहादुर देउवा निकट रानाको जीतले काँग्रेस दैलेखबाट पार्टी केन्द्रीय तहमा पहिलो पटक प्रतिनीधित्व भएको छ ।

नेपाली काँग्रेसका नेताहरुले पहिलो पटक केन्द्रिय सदस्यमा दैलेखले अवसर पाएको भन्दै जिल्लाका लागि गर्वको विषय भएको प्रतिक्रिया दिएका छन । पौडेल समुह बाट केन्द्रिय सदस्यका उम्मेदवार हुनुभएका गणेश बहादुर खड्का र बासना थापा भने पराजीत भएका थिए ।
राना २०४६ सालबाट नेपाल विद्यार्थी संघ (नेविसंघ) को राजनीति हुँदै कांग्रेस राजनीतिमा आएकी उनी २०५० सालमा नेपाल महिला संघ दैलेखको उप–सभापतिमा चयन भएकी थिइन २०७१ मा नेपाल महिला संघ दैलेखको सभापति बनेकी उनी २०७४ को प्रतिनीधि सभा सदस्य निर्वाचनमा समानुपातिक सांसदको सूचीमा रहे पनि सांसद बन्न सकेकी थिइनन ।