प्रदेशस्तरीय फुटबल प्रतियोगिताको उपाधि जुम्लालाई

जुम्ला  :  कर्णाली प्रदेशस्तरीय फुटबल प्रतियोगिताको उपाधि जुम्लाले जितेको छ । जुम्ला चन्दननाथ नगरपालिका ५ स्थित चन्दननाथ रंगशालामा शुक्रबार भएको फाइनलमा हुम्लालाई ०–४ गोल गर्दै उपाधि जुम्लाले जितेको हो । जुम्लाको जितका लागि रुवेन भण्डारीले हृयाट्रिक गरे । दोस्रो हाफमा जुम्लाकै महेन्द्र शाहीले पेनाल्टी सुटआउटमा १ गोल थपेपछि जुम्लाको ४ गोल भएको हो ।

हुम्लाले पटक–पटक गोल गर्ने अवसर पाए पनि सफल हुन सकेन । जुम्लाबाट पराजित हुम्ला उपविजेता बनेको हो । उपाधि जितेको जुम्लाले प्रदेशस्तरीय फुटबलको कप, मेडल प्रमाणपत्र पाएको छ । विजेता र उपविजेता टिमलाई कर्णाली प्रदेशसभा सदस्य पूर्वसामाजिक विकासमन्त्री टेकराज पछाई, प्रदेशसभा सदस्य देवन्द्रबहादुर शाही, प्रमुख जिल्ला अधिकारी जयकुमार घिमिरे लगायतले प्रमाणपत्र, मेडल र टफ्री हस्तान्तरण गरेका छन् ।

प्रदेशस्तरीय फुटबलमा कर्णालीका १० मध्ये ६ जिल्लाबाट टिम दर्ता भएको थियो । जुम्ला, मुगु, हुम्ला, कालिकोट, सुर्खेत र जाजरकोट जिल्लाले प्रदेशस्तरीय फुटबल प्रतियोगितामा भाग लिएको जिल्ला फुटबल संघ जुम्लाका महासचिव दीपेन्द्र हमालले जानकारी दिए । जसमा जाजरकोट र मुगु नकाउट चरणबाट बाहिरिए । जुम्लाले सुर्खेत र हुम्लाले कालिकोटलाई सेमिफाइनलबाट पराजित गरेपछि बाहिरिए ।