मुख्यमन्त्री शर्मा भदौ १४ मा स्वीट्जरल्याण्ड भ्रमणमा जादै

सुर्खेत  :   कर्णालीका मुख्यमन्त्री राजकुमार शर्मा स्वीट्जरल्याण्डको भ्रमणमा जाने भएका छन् । मुख्यमन्त्री शर्मा यही भदौ १४ गते स्वीट्जरल्याण्ड भ्रमणमा निस्किने भएका हुन् । शर्माले शुक्रवारको संसदमा भ्रमणबारे जानकारी गराएका छन् । उनी अन्तर्राष्ट्रिय मानवअधिकार आयोग, अन्तर सरकार संस्थाको आयोजनामा स्वीट्जरल्याण्डमा हुने कार्यक्रममा सहभागी हुनका लागि त्यसतर्फ जान लागेका हुन् ।
उक्त कार्यक्रम सेप्टेम्बर १ र २ मा हुँदै छ । वित्तीय, सामाजिक, मानवता, निजी, सहकारी, समुदाय र हरित कार्यक्रम समेटिएको सो सेमिनारमा कर्णाली सरकारसँग सहकार्यकाबारे छलफल हुने उनले बताए । त्यसका लागि संघीय सरकारबाट अनुमति लिइसकिएको पनि उनले सुनाए ।

संघीय सरकारको निर्णयअनुसार भ्रमणका लागि स्वीकृत प्राप्त भइसकेको छ । स्वीट्जरल्याण्ड भ्रमण कर्णालीमा लगानी भित्र्याउने, रोजगारीको सिर्जना गर्ने तथा समृद्धिको कार्यक्रमलाई अगाडि बढाउने सन्दर्भसँग जोडिएको छ,’ शर्माले भने कर्णालीमा लगानी भित्र्याउनका लागि विभिन्न पहलहरू भइरहेको पनि बताए ।