११ देशका राजदूतहरु पोखरामा हाइकिङ गर्दै

पोखरा  :  विश्व पर्यटन दिवसका अवसरमा गण्डकी प्रदेश सरकारको निम्तोमा पोखरा पुगेका ११ मुलुकसहित अन्तर्राष्ट्रिय नियोगका राजदूतहरु अहिले घुमघाममा व्यस्त छन् । उनीहरुले आज पोखरा–२४ कास्कीकोटको देउरालीमा अपाङ्गमैत्री पदमार्गमा पदयात्रा गरे ।

कतार, युएई, फिनल्याण्ड, उत्तर कोरिया, साउदी अरेविया, श्रीलङ्का, बङ्गलादेश, जर्मनीलगायत देशका राजदूत पोखरा पुगेका हुन् । राष्ट्रसंघ, सार्क सचिवालयसहितका नियोगका कूटनीति समेत पनि पोखरा पुगेका छन् । नेपाल पर्यटन बोर्ड गण्डकी, ट्रेकिङ एजेन्सी एशोसिएशन अफ नेपाल ९टान० पश्चिमाञ्चलको समन्वयमा उनीहरुलाई हाइकिङ गराइएको हो ।

राजदूतसहितका विशिष्ट कूटनीतिज्ञको पोखरा भ्रमणले थलिएको पर्यटन व्यवसाय माथि उठाउन सकारात्मक सन्देश प्रवाह गर्ने विश्वास लिइएको गण्डकी प्रदेशका पर्यटन, उद्योग, वाणिज्य तथा आपूर्ति मन्त्रालयका सचिव ज्ञानेन्द्र पौडेलले बताए । विदेशी राजदूतसहित विशिष्ट कूटनीतिज्ञको पोखरा भ्रमणको कार्यक्रमले पर्यटन सम्बद्ध क्षेत्रका व्यवसायीमा उत्साह थपेको पोखरा पर्यटन परिषद्का अध्यक्ष गोपीबहादुर भट्टराईले बताए ।

राष्ट्रसंघकी नेपाल कार्यालय प्रमुख सारा न्यान्ती बिसेलोले सराङकोटको डाँडामा पुगेर पोखरा अब खुला भएको भन्दै पर्यटकलाई घुमघामका लागि पोखरा आउन आग्रह गरेकी छिन् । साभार नेपालप्रेस