दैलेख एमालेलाई अध्यक्ष ओलीको निर्देशन– जानेलाई छाडेर अघि बढ्नुस्

दैलेख  :  नेकपा एमालेका अध्यक्ष केपी शर्मा ओलीले दैलेखका नेतालाई पार्टी छाड्न खोज्नेलाई छाडेर र आउनेलाई स्वागत गरेर अघि बढ्न निर्देशन दिएका छन् । सोमबार एमालेका दैलेख इन्चार्ज लक्ष्मी प्रसाद पोखरेल, सहइन्चार्ज विष्णु रिजाल, जिल्ला अध्यक्ष रवीन्द्रराज शर्मा, जिल्ला समन्वय समिति प्रमुख प्रेम थापा, टाटिकाध गाउँपालिकाका अध्यक्ष धिरबहादुर शाहीलगायत नेतासँगको भेटमा अध्यक्ष ओलीले भने– पार्टीमा आउनेलाई उचित भूमिका दिएर अघि बढ्नुस्, छाड्नेहरुले जबरजस्ती रोक्न सकिँदैन ।

पार्टी एकताका लागि आफूले धेरै प्रयत्न गरेको भन्दै अध्यक्ष ओलीले कोही कसैको स्वास्र्थका लागि पार्टीलाई बन्धक बनाउन नसकिने बताएको भेटमा सहभागी समन्वय समितिका प्रमुख थापाले जानकारी दिए । अब पार्टी अधिवेशनमा जुट्न निर्देशन दिँदै ओलीले भने– एमालेको सरकारले गरेका राम्रो कामको प्रचार गर्नुस्, परमादेश सरकारले फैलाएको भ्रम चिर्नुस् ।

भेटमा दैलेखका नेताहरुले सकेसम्म पार्टी एकता जोगाउन ओलीसँग आग्रह गरेका थिए ।  नेपालप्रेस