Loading... आजः शनिबार, मंसिर ११, २०७८
Trending

दैलेख अस्पताललाई २६ लाखको स्वास्थ्य सामग्री सहयोग

दैलेख  :  कोभिड–१९ को प्रतिकार्यका लागि दैलेख अस्पताललाई २६ लाख मुल्य बराबरको स्वास्थ्य सामग्री सहयोग गरिएको छ । कारितास नेपालले २६ लाख ३२ हजार ६ सय रुपैयाँ बराबरको सामग्री सहयोग गरेको हो । कारितास नेपाल क्षेत्रिय कार्यालय कोहलपुर बाँकेका क्षेत्रिय संयोजक जनकप्रसाद शर्माका अनुसार अस्पताललाई २० थान अक्सिजन सिलिण्डर, १० थान अक्सिजन कन्सन्ट्रेटर, ३४ थान पल्सअक्सिमिटर, ४ सय ५० थान पीपिई सेट, ५ सय १५ बक्स सर्जिकल मास्क, १ सय बक्स सर्जिकल ग्लोब्स र २ सय १० वटा हेण्डसेनीटाइजर सहयोग गरिएको हो ।

मंगलवार सहायक प्रमुख जिल्ला अधिकारी हरिप्रसाद देवकोटा, नारायण नगरपालिकाका उपप्रमुख सावित्री मल्ल, स्वास्थ्य सेवा कार्यालय दैलेखका निमित्त स्वास्थ्य सेवा व्यवस्थापक थीरप्रसाद रेग्मी, दैलेख अस्पतालका डा। जगत थापा लगाएतको उपस्थितीमा सामग्री हस्तान्तरण गरिएको छ ।

कारितास नेपालले दैलेख अस्पतालमा आपत्तालिन अवस्थामा कोभिड–१९ को उपचारमा आउने बिरामीहरुलाई आपत्तकालिन सेवा प्रदान गर्न ३ जना स्वयंमसेवकहरु खटाएको क्षेत्रिय संयोजक शर्माले जानकारी दिए । उनका अनुसार स्वंयमसेवकहरुबाट २ सय ३० जना व्यक्तिहरुले प्रत्यक्ष रुपमा मनोसामाजिक परामर्श लगाएतका सेवा प्राप्त गरिसकेका छन् ।
उक्त सेवालाई थप प्रभावकारी बनाउन हेल्पलाइन नम्बर ९८०१५७३०३१ सञ्चालन गरिने क्षेत्रिय संयोजक शर्माले बताए । उनका अनुसार स्वयंमसेवकहरुले कोभिड–१९ बाट प्रभावित र अति जोखिममा परेका व्यक्ति तथा परिवारहरुलाई एक जना बराबर दुई हजार दुई सयका दरले ४ सय ८२ जनालाई १२ लाख २५ हजार ४८५ रुपैयाँ बराबरको आइसोलेसन किट उपलब्ध गराईनेछ ।

कारितासले मानव अधिकार प्रर्वधन, शान्ति निर्माण, सामुदायिक विकास परियोजना, गरिबी तथा विपद् जोखिम न्यूनिकरण परियोजना र आपत्तकालिन मानवीय सेवाको क्षेत्रमा काम गर्दै आइरहेको छ । करिब ३० बर्षदेखि नेपालका ५० बढि जिल्लामा कल्याणकारी सेवा प्रवाह गर्दै आएको संस्थाले हाल दैलेख सहित नेपालका १४ वटा जिल्लाहरुमा नेपाल कोभिड–१९ प्रतिकार्य परियोजना सञ्चालन गरेको छ ।

क्षेत्रिय संयोजक शर्माका अनुसार परियोजनाले स्वास्थ्य संस्थाहरुलाई आवश्यक स्वास्थ्य सामग्री उपलब्ध गराउने, नागरिक सहायता कक्ष सञ्चालन, अस्पताल आइसोलेसन केन्द्र र त्यहाँ आउने व्यक्तिहरुलाई आवश्यक सहायता दिने लगाएतका क्रियाकलाप सञ्चालन गरिरहेको छ ।

error: Content is protected !!