थपिए दुई हजार छ सय नयाँ मतदाता

दैलेख : दैलेखमा दुई हजार छ सय ४२ जना नयाँ मतदाता थपिएका छन् । निर्वाचन आयोगले फागुन २१ गतेका लागि तोकिएको प्रतिनिधि सभा निर्वाचन लक्षित मतदाता नामावली सङ्कलन गर्दा दुई हजार ६४२ नयाँ मतदाता थपिएका हुन । राष्ट्रपतिबाट गत असोज ९ गते मतदाता नामावलीसम्बन्धी अध्यादेश जारी भएपछि जिल्ला निर्वाचन कार्यालय दैलेखले असोज १० गतेदेखि मङ्सिर पाँच गते सम्म मतदाता नामावली सङ्कलन गरेको थियो ।

जिल्ला निर्वाचन कार्यालय दैलेखका कार्यालय प्रमुख नर बहादुर सलामीले मतदाता नामावली सङ्कलन अवधि भर ६८२ जनाले निर्वाचन कार्यालयमा आएर बायोमेट्रिक गरी मतदाता नामावली बनाएको र एक हजार ९४४ जनाले राष्ट्रिय परिचयपत्र मार्फत मतदाता नामावली बनाएको बताउनुभयो । उहाँले अन्य जिल्लाका १६ जनाले समेत जिल्ला निर्वाचन कार्यालय दैलेखमा आएर मतदाता नामावलीमा नाम दर्ता गराएको बताउनुभयो । उहाँले ३१ जना मतदाता नामावलीमा नाम दर्ता गरेको भए पनि कागजपत्र नपुगेर होल्ड भएको जानकारी दिनुभयो । उहाँले भन्नुभयो अन्य जिल्ला बाट मतदाता नामावली बनाएको विवरण पछि आउने हुँदा अहिले नै नयाँ मतदाता यति भए भनेर एकिङ हुँदैन । पुसको १० गते सम्म सबै विवरण आएपछि मात्र कति जना मतदाता थपिए भन्ने जानकारी प्राप्त हुने निर्वाचन अधिकारी सलामीको भनाइछ ।

निर्वाचन आयोगले राष्ट्रिय परिचयपत्र बनाउँदा लिइएको व्यक्तिको जैविक तथ्याङ्क (बायोमेट्रिक) प्रयोग गरेरै अनलाइनबाट मतदाता नामावलीमा नाम दर्ता गर्न सक्ने व्यवस्था मिलाएका कारण एक हजार ९४४ जना नयाँ मतदाताको मतदाता नामावलीमा नाम दर्ता भएको कार्यालयले जानकारी दिएको छ । मतदाता नामावली दर्तामा उत्साहपूर्वक सहभागिता देखिएर भिडभाड बढेपछि नेपाल सरकारको आग्रहमा निर्वाचन आयोगले पाँच दिन म्याद थप गर्दै मङ्सिर ५ गतेसम्म मतदाता नामावली दर्ताको व्यवस्था मिलाएको थियो ।