ट्रक दुर्घटनामा चालक सहित तीन जनाको मृत्यु

दैलेख  : नेपालगञ्जबाट दैलेखका लागि ग्यास सिलिण्डर ल्याएर आउदै गरेको ट्रक आज विहान ९ बजेतिर दुर्घटना हुँदा चालक सहित तीन जनाको ज्यान गएको छ । भे १ क २२०१ नम्बरको ट्रक दैलेखको गुराँस गाउँपालिका–४ तालपोखरी मोडमा दुर्घटना हुँदा उनीहरुको घटनास्थलमै ज्यान गएको प्रहरीले जनाएको छ ।

जिल्ला प्रहरी कार्यालय दैलेखका प्रहरी प्रमुख किशोर लम्सालले दुर्घटनामा परी मृत्यु हुनेमा बाँके जिल्ला घरमा भएका चालक २९ वर्षीय कृष्ण चौधरी, ट्रकमा यात्रारत दाङ्ग जिल्ला घर भएका दुई जना अन्दाजी १८ वर्षीय बिष्णु चौधरी र २७ वर्षका लछिराम चौधरी रहेको जानकारी दिए ।
उनले तालपोखरी झर्ने छोटो बाटो नजिक मोडमा ब्रेक फेल भई माथिल्लो सडकबाट चिप्लिएर करिब एक सय २५ मीटर तल्लो सडकमा खसेको प्रत्यक्षदर्शीले बताएका छन् । ओरालो सकिएर मोडमै आइपुग्दा चालकले बे्रक लागेन भनेपछि सहचालक सल्यानको कुपिण्डेदह गाउँपालिका–७ का २८ वर्षीय प्रकाश कुमाईले सडकमै हामफालेर ज्यान जोगाएको जानकारी दिए ।

दुर्घटनाको कारण, घटनास्थलको अवस्था अनुसन्धान र मृतकहरुको शव उठाउन जिल्ला सदरमुकामबाट प्रहरी निरीक्षक दीपकसिंह बिष्टको नेतृत्वमा टोली घटनास्थल तर्फ पठाइएको जिल्ला प्रहरी कार्यालय दैलेखका इञ्चार्ज प्रहरी प्रमुख लम्सालले जानकारी दिए ।