पर्यटन प्रवर्द्धन बाटै कर्णालीको समृद्धि

दैलेख  :  कर्णाली प्रदेश सरकारका उद्योग पर्यटन वन वातावरणमन्त्री जीतबहादुर मल्लले पर्यटन प्रवर्द्धनमार्फत नै कर्णालीको समृद्धि सम्भव रहेको बताएका छन । उद्योग पर्यटन, वन वातावरण मन्त्रालय मातहत रहेका कार्यालयबाट सञ्चालन गरिएको विभिन्न विकास निर्माण र दैलेख जिल्लामा रहेका पर्यटकीय क्षेत्रमा भए गरेका कामको निरीक्षण गर्न दैलेख पुगेका उनले कर्णालीमा रहेको पर्यटकीय क्षेत्रको प्रवर्धन गरेर समृद्धि प्राप्त गर्न सकिने बताए ।

उनले कर्णालीमा रहेको पर्यटन क्षेत्रमा सरकारले लगानी गरेअनुसार प्रतिफल प्राप्त गर्न नसकेको समेत बताए । । कर्णाली प्रदेश सरकार वा सङ्घीय सरकार स्थानीय सरकारले पर्यटन प्रवर्द्धनमा लगानी गरेको भए पनि त्यसको प्रतिफल देख्न नसकेको बताए । पर्यटकलाई जबरजस्ती आउनेभन्दा पनि स्वस्फूर्त रूपमा आउने वातावरण सिर्जना गर्नेतर्फ प्रदेश सरकार लागेको उनको भनाइ छ ।

कर्णाली जल जमिन र जडीबुटीको राम्रो सम्भावना भएको भए पनि त्यसको सदुपयोग हुन नसकेको मन्त्री मल्ले बताए । उनले कर्णालीमा उद्योग स्थापना, विद्युत् उत्पादन, जडीबुटीको प्रशोधन र पर्यटन क्षेत्रको प्रचार प्रसार गर्न आवश्यक नीति नियम बनाउन आफू लाग्ने बताए । नीति निर्माण नभएका होइनन् भएका छन्, तर त्यसको कार्यान्वयन हुन सकिरहेको छैन उनले भने ।

पछिल्लो समय नागरिकहरूको बन क्षेत्र अक्रिमण गर्ने चुनौती समेत देखिएको बताउँदै उहाँले वन क्षेत्रमा बनेका घर टहरा हटाउन मातहतका निकायलाई निर्देशन समेत गरेको मन्त्री मल्ले बताए । कर्णाली राजमार्गको स्तरोन्नतिसँगै नेपालगञ्ज सुर्खेत, दैलेख कालिकोट हुँदै नाग्चेनाग्लासम्म पुग्ने त्रिदेशीय सडक निर्माणलाई प्राथमिकता राखेर केन्द्र सरकारले विशेष बजेट विनियोजन गर्नु पर्ने बताए ।

उनले दुवै तर्फबाट सडक निर्माणको काम भएपनि बजेट प्राप्त नहुँदा काम कम हुनेगरेको बताए । कर्णालीमा थुप्रै पर्यटकीय गन्तव्य भए पनि पर्यटकीय स्थलको इतिहास र जानकारी लिएर त्यसको प्रचार प्रसार गर्न सञ्चार क्षेत्रले महत्त्वपूर्ण भूमिका निर्वाह गर्नुपर्ने बताए ।