विराटनगरलाई हराउँदै जनकपुरले निकाल्यो दोस्रो जित

काठमाडौँ  :  नेपाल टी–२० लिगमा जनकपुर रोयल्सले लगातार दोस्रो खेलमा जित निकाल्दा विराटनगर सुपर किंग्सले भने प्रतियोगितामा दोस्रो हार भोगेको छ। टियू मैदान कीर्तिपुरमा सोमबार भएको दिनको दोस्रो खेलमा जनकपुर ५ विकेटले विजयी भयो। यसअघि जनकपुरले पोखरालाई पराजित गर्दा विराटनगर भने लुम्बिनि अलस्टार्ससँग पराजित भएको थियो।

टस जितेर पहिलो ब्याटिङ गरेको विराटनगर १९.५ ओभरमा १ सय ४० रनमा समेटियो। उसका लागि सिकन्दर रजाले ३८ रन बनाउनु सर्वाधिक रनका रुपमा रहँदा रोहित पौडेलले ३२ तथा हुसेइन तलातले २८ रन बनाएका थिए। त्यस्तै ओपनर अर्जुन साउदले १८ रन बनाए। थप दोहोरो स्कोरका रुपमा विवेक यादवले १० रन जोडेका थिए। उसका अन्य कुनैपनि ब्याटरले गतिलो प्रदर्शन गर्न सकेनन्।

विराटनगरलाई मध्यम स्कोरमा समेट्ने क्रममा जनकपुरका लागि ललित राजवंशीले ५ विकेट लिएका थिए। त्यस्तै केशरिक विलियम्स र मोहम्मद आदिल अलामले समान २–२ विकेट लिएका थिए। त्यस्तै सोमपाल कामीले १ विकेट लिएका थिए।

१ सय ४१ रनको स्कोर पछ्याएको जनकपुरले निर्धारित २० ओभरमा ५ विकेट गुमाएर लक्ष्य पुरा गरेको थियो। उसका लागि चाडविक वाल्टनले सर्वाधिक ५९ रन बनाएका थिए। उनीबाहेक कप्तान ट्रेभोन ग्रिफितले २५ रन बनाउँदा सर्फुदिन असर्फले २३ रन बनाएका थिए। त्यस्तै मोहम्मद आदिल अलाम १० रनमा नटआउट रहे। विराटनगरका हसिन तलात, नन्दन यादव र रिजन ढकालले समान १–१ विकेट लिएका थिए।