शिक्षक , शिक्षिकालाई आत्मरक्षा तालीम

दैलेख  :   विद्यालयमा अध्ययनरत किशोरीहरूलाई लैङ्गिक हिंसा बाट बच्न सिकाउने उद्देश्यले शिक्षक शिक्षिकालाई आत्मरक्षा तालीम प्रदान गरिएको छ । लैङ्गिक हिंसा विरुद्धको १६ दिने अभियान अन्तर्गत लैङ्गिक हिंसा विरुद्ध आव्हान ः आत्मरक्षाको तालिम हाम्रो अभियान भन्ने नाराका साथ नेपाल राष्ट्रिय शिक्षक सङ्गठन महिला विभागले विद्यालयका शिक्षक र शिक्षिकालाई आत्मरक्षा तालीम प्रदान गरिएको छ ।

नेकपा राष्ट्रिय शिक्षक सङ्गठनका जिल्ला अध्यक्ष पुष्पा थापाले जिल्लाको ११ स्थानीय पालिकाबाट दुई जना शिक्षिका र एक जना शिक्षक प्रशिक्षार्थी सहभागिता गराएर आत्मरक्षा तालीम प्रदान गरिएको बताइत । उनले लैङ्गिक हिंसाको न्यूनीकरण गर्नका लागी किशोरीहरूलाई कसरी सुरक्षित बनाउने भन्ने विषयमा शिक्षक शिक्षिकालाई तालीम प्रदान गरिएको बताइन । उनले भनिन विद्यालय मार्फत विद्यालयमा अध्ययनरत किशोरीहरूलाई सशक्त बनाउने र लैङ्गिक हिंसा विरुद्ध आवाज उठाउने उद्देश्यले उक्त कार्यक्रमको आयोजना गरिएको हो ।

आत्मरक्षा तालीमका प्रमुख प्रशिक्षक कर्णाली प्रदेश खेलकुद परिषद् सदस्य हेमा खड्काले किशोरीहरूले आत्मरक्षा तालीम लिएको खण्डमा आफ्नो आत्मरक्षा गर्न सकिने बताइन । उनले कसैले हिंसा गरेको खण्डमा किशोरीले त्यसको प्रतिकार गरी हिंसा बाट बच्न प्रत्येक विद्यालयमा यस्ता कार्यक्रम गर्नु जरुरी रहेको बताइन । उनले भनिन किशोरीहरूलाई सशक्त बनाउन स्थानीय पालिका र सम्बन्धित विद्यालय जिम्मेवार बन्नुपर्ने हुन्छ ।
जिल्लामा पछिल्लो समय किशोरीहरूलाई आत्मरक्षा तालीम प्रदान गरे पनि लैङ्गिक हिंसा विरुद्धका उजुरीमा कमी आउन नसकेको बताइएको छ । जिल्ला प्रहरी कार्यालय दैलेखका प्रहरी प्रमुख भुवनेश्वर प्रसाद साहले लैङ्गिक हिंसा विरुद्ध समुदाय प्रहरी साझेदारी कार्यक्रम मार्फत विभिन्न कार्यक्रम सञ्चालन गरे पनि चालु आर्थिक वर्षको चार महिनामा जबरजस्तकी करणका चार मुद्दा,बहुविवाहका दुई मुद्दा,अभद्र व्यवहारका पाँच मुद्दा प्रहरीमा परेको बताए ।