मोटरसाइकल चोरी गिरोहमा संलग्न ६ जना पक्राउ

दैलेख  :  चोरी भएका मोटरसाईकल सहित मोटरसाइकल चोरीमा संलग्नलाई प्रहरीले पक्राउ गरेको छ । जिल्ला प्रहरी कार्यालयले पत्रकार सम्मेलनको आयोजना गरी मोटरसाइकल चोरीमा संलग्न ६ जनालाई सार्वजनिक गरेको छ । मोटरसाइकल सहित डाँका तथा चोरी गिरोहमा संलग्न रहेका ६ जना युवाहरुलाई पक्राउ गरि सार्वजनिक गरिएको प्रहरी नायब उपरीक्षक (डिएसपी) भुवनेश्वर प्रसाद साहले बताए । उनले विभिन्न मितिमा मोटरसाइकल हराएको भन्दै प्राप्त निवेदनका आधारमा विभिन्न स्थानबाट चोरी भएका १२ वटा मोटरसाइकल र चोरी गिरोहमा संलग्न रहेकाहरुलाई पक्राउ गरिएको बताए ।

उनका अनुसार चामुण्डाविन्द्रासैनी नगरपालिका–८ का २१ वर्षीय रोशन शाही, २० वर्षीय दिनेश शाही, २१ वर्षीय बिनोद शाही र २० वर्षीय आशिष शाही पक्राउ परेका छन् । यस्तै दुल्लु नगरपालिका–५ मा साथी अटो पार्टस (ग्यारेज) सञ्चालन गरी बस्ने दुई जनालाई समेत पक्राउ गरिएको डिएसपी साहले बताए । ग्यारेज सञ्चालन गरी बस्ने दुल्लु नगरपालिका–७ का २८ वर्षीय पुस्करबाबु बज्राचार्य र वडा नम्बर ९ का २० वर्षीय जनक पुरी रहेको उनले बताए । हालसम्म मोटरसाइकल हराएको भन्दै निवेदन दिने जाहेरवाला पीडितहरु ६ जना खुल्न आएको डिएसपी साहले जानकारी दिए ।