जेष्ठनागरिकको घरआगनमै निःशुल्क स्वास्थ्य परीक्षण

दैलेख  :  नारायण नगरपालिका–७ का नन्दलाल गौतम ८२ वर्ष पुगे । उमेर ढल्कँदै गएपछि बेलाबेला विभिन्न स्वास्थ्य समस्याले घेरिरहन्छ । अस्पताल जान एक्लै नसक्ने भएका उनलाई स्वास्थ्यकर्मीको टोलीले घरमै पुगेर चेकजाँच गर्न थालेपछि खुसी भएका छन । स्वास्थ्यकर्मीले घरमै पुगेर प्रेसर,सुगर,दम लगायतका रोगको चेकजाँच पछि आवश्यक औषधी समेत उपलब्ध भएपछि उहाँ अहिले आफै दङ्ग परेका छन । उनले भने हामी ज्येष्ठ नागरिकका लागि स्वास्थ्यकर्मी खटाएछ । यो निकै खुसीको कुरा हो ।

नारायण नगरपालिका –७ कै ६८ वर्षीय हर्क बहादुर दमाईलाई पनि प्रेसर र दमको समस्या छ । बेलाबेला आफै अस्पताल पुगेर औषधी लिने उनलाई यो महिना स्वास्थ्यकर्मी घरमै आएर चेकजाँच र औषधि दिएपछि उनी पनि खुसी भएका छन । उनले भने हामी बुढेसकालका मानिसका लागि पनि सरकारले सोचे जस्तो लाग्यो । नारायण नगरपालिका–७ का वडा कार्यालयको आर्थिक सहयोग र बसन्तमाला स्वास्थ्य चौकीको प्राविधिक सहयोगमा ज्येष्ठ नागरिक मासिक स्वास्थ्य परीक्षण कार्यक्रम सञ्चालन भएपछि जेष्ठनागरिक खुसी हुने गरेका छन् ।

नारायण नगरपालिका –७ का अध्यक्ष खड्ग बहादुर शाहीले आफूले निर्वाचनको बेला जनताका बिचमा गरिएको प्रतिबद्धता अनुसार जेष्ठनागरिकलाई घर आगमनै स्वास्थ्य परीक्षण गर्न वडा कार्यालय बाट बजेट विनियोजन गरेर उक्त कार्यक्रम सुरु गरिएको बताए । उनले निर्वाचित वडा जनप्रतिनिधिको पहिलो बैठक बाट योजना बनाएर बजेट विनियोजन गरेपछि वडामा रहेका पाँच वटै टोलमा रहेका ज्येष्ठ नागरिकको स्वास्थ्य परीक्षण गरिएको बताए ।

नारायण नगरपालिका –७ का वडा सचिव नेत्र बहादुर बस्नेतले वडा बाट पहिलो चरण ८० हजार बजेट विनियोजन गरेको बताए । उनले भने हामीले पहिलो चरण उहाँहरूको स्वास्थ्य परीक्षण गर्छौ सामान्य औषधी त्यही वितरण गछौ र स्वास्थ्य चौकीमा समेत उपलब्ध नहुने भएको खण्डमा वडा कार्यालयले खरिद गरेर वितरण गर्छौ ।