सुरक्षा भत्ता पहुँच सुनिश्चितता नगर घोषणा

कमल शर्मा
दैलेख  :   जिल्लाको नारायण नगरपालिकालाई सामाजिक सुरक्षा भत्ता पहुँच सुनिश्चितता नगर घोषणा गरिएको छ । नेपाल सरकारले वितरण गर्ने पाँच वर्षमुनिका बालबालिका,एकल महिला,विधवा,अपाङ्गता भएका व्यक्ति,ज्येष्ठ नागरिक,दलित ज्येष्ठ नागरिक,लोपउन्मुख समुदायका व्यक्तिहरूले प्राप्त गर्ने सामाजिक सुरक्षा भत्तामा पहुँच भएपछि नारायण नगरपालिका सामाजिक सुरक्षा भत्ता पहुँच सुनिश्चितता नगरपालिका घोषणा गरिएको हो ।

स्थानीय सरकार संचालन ऐन २०७४ को आधारमा सामाजिक सुरक्षा सुरक्षा वितरणमा सबैको पहुँच सुनिश्चितता गर्न बनेको आधारभूत कार्यविधि २०८१ निर्माण गरी कार्यान्वयनमा ल्याएपछि बुधवार कर्णाली प्रदेश सरकारका सामाजिक विकास मन्त्री घनश्याम भण्डारीले सामाजिक सुरक्षा भत्ता पहुँच सुनिश्चितता नगर घोषणा गर्नुभएको थियो ।

सुरक्षा भत्ता पहुँच सुनिश्चितता नगर घोषणा कार्यक्रममा बोल्दै मन्त्री भण्डारी सामाजिक सुरक्षा भत्ता वितरणका लागी तोकिएका सबै मापदण्ड पुरा गरी देशकै र कर्णाली प्रदेशका ७९ स्थानीय तह मध्ये पहिलो स्थानीय भएको बताउनुभयो । उहाँले नेपाल सरकारले प्रदान गर्ने सामाजिक सुरक्षा भत्ता सम्बन्धित नागरिकहरूले प्राप्त गर्ने र त्यस बाट उनीहरूको आत्मसम्मानमा समेत सहयोग पुग्ने बताउनुभयो । उहाँले भन्नुभयो सामाजिक सुरक्षा भत्ता प्राप्त गर्ने लाभग्राहीलाई घरपरिवारले समेत माया गर्ने गरेका छन् ।सामाजिक सुरक्षा भत्ता पाउने दुई जना नागरिक भएको भए एक घरमा एक लाख भन्दा बढी आम्दानी हुने र त्यस बाट पारिवारिक खर्च धान्न समेत सहयोग पुगेको मन्त्री भण्डारीको भनाइछ ।

नारायण नगरपालिकाका नगर प्रमुख लोमन शर्माले सामाजिक एकता,साझेदारी र सहकार्यलाई प्रवर्धन गरी बृहत् सामाजिक सुरक्षा कार्यक्रमको कार्यान्वयन गर्दै समुदायमा जोखिममा रहेका व्यक्ति तथा परिवारलाई सहयोग तथा सुरक्षा प्रदान गर्ने उद्देश्यले रहेको बताउनुभयो । उहाँले अति विपन्न तथा सीमान्तकृत समुदायलाई व्यापक सामाजिक सुरक्षा सेवा प्रदान गरी नगरपालिका भित्र गरिबी असमानता घटाउन सहयोग पुग्ने बताउनुभयो । उहाँले भन्नुभयो नगरपालिकाले निर्माण गर्ने नीति तथा कार्यक्रम बनाउन समेत यसले सहयोग पुग्नेछ ।

नगरपालिकाका प्रमुख प्रशासकीय अधिकृत बमबहादुर केसीले नगरपालिकाले निर्माण गरेको कार्यविधि अनुसार नगरपालिकाका ११ वटै वडा कार्यालयहरूले योग्य लाभग्राहीको खोजपड्ताल, सुविधा उपलब्ध गराउन आवश्यक पर्ने कागजी प्रक्रिया सहजीकरण देखि सामाजिक सुरक्षा भत्ताको लागि प्रमाणीकरण समेत गर्ने गरी आधार तयार गरेपछि नगरपालिकालाई सामाजिक सुरक्षा भत्ता पहुँच सुनिश्चितता नगर घोषणा गरिएको बताउनुभयो । उहाँले विगतमा सामाजिक सुरक्षा भत्ता वितरण गर्दा अनियमितता हुने गरेका कारण नेपाल सरकारले सामाजिक सुरक्षा भत्ता वितरण सम्बन्धी कार्यविधि निर्माण गरी बैङ्किङ प्रणाली मार्फत वितरण गर्न थालिएको बताउनुभयो । उहाँले भन्नुभयो ग्रामीण बस्तीका लाभग्राहीहरूले यसबाट ठुलो लाभ र राहत महसुस गरेका छन् ।

ज्येष्ठ नागरिक सङ्घका जिल्ला अध्यक्ष वीर बहादुर भण्डारी नेपाल सरकारले वितरण गर्ने सामाजिक सुरक्षा भत्ता वितरणमा अझै सहजता ल्याउनु पर्ने बताउनुभयो । उहाँले सामाजिक सुरक्षा भत्ता लिन अहिले पनि बैङ्कमा लाइन लाग्नुपर्ने झन्झटिलो हुने गरेको बताउनुभयो । सेभ द चिल्ड्रेनको साझेदारीमा एभरेस्ट क्लब दैलेखद्वारा सञ्चालित पहुँच परियोजना पृष्ठपोषणमा नारायण नगरपालिकाले आफ्नो श्रोत र सक्रियतामा पहुँच सुनिश्चितता घोषणा गरिएको बताइएको छ ।