अनलाइनबाटै नागरिकता सिफारिस

दैलेख  :   जिल्ला प्रशासन कार्यालय दैलेखले अनलाइन प्रणाली मार्फत नागरिकताको सिफारिस गर्ने व्यवस्था मिलाएको छ । गत असार बाट अनलाइन प्रणाली मार्फत नागरिकताको सिफारिसको व्यवस्था गर्न गृह मन्त्रालयले परिपत्र गरे पनि असोज बाट उक्त सेवा सुरु गर्न लागिएको जिल्ला प्रशासन कार्यालय दैलेखले जानकारी दिएको छ ।
प्रमुख जिल्ला अधिकारी बद्रीनाथ गैह्रेले सेवाग्राहीले वडा बाट नागरिकताको सिफारिस गरेर ल्याउने र जिल्लामा आउँदा कागजपत्र नपुगेर दुःख पाउने गरेकाले अनलाइन प्रणाली मार्फत नागरिकताको सिफारिस सुरु गरेको बताए ।उनले सेवाग्राहीले नागरिकताका लागि वडा कार्यालयबाट लिखित सिफारिसको कागजपत्र बोकेर प्रशासनमा धाउनुपर्ने समस्याको समाधान हुने बताए । उनले भने नागरिकता सिफारिसको कार्यलाई समयसापेक्ष, प्रविधिमैत्री र सेवाग्राहीलाई झन्झटरहित छिटोछरितो सेवा प्रवाह गराउन अनलाइन प्रणालीमार्फत नागरिकताको सिफारिस गर्ने व्यवस्था मिलाउन लागिएको छ ।

वडा कार्यालयले नागरिकताको सिफारिस गरेको खण्डमा बिग्रेको अवस्थामा समेत जिल्ला प्रशासन कार्यालयले सच्चाएर नागरिकता प्रदान गर्न सक्ने प्रजिअ गैह्रेले बताए । उनले भने सेवाग्राहीले नागरिकताका लागी वडामा अनलाइन फारम भर्न बित्तिकै जिल्ला प्रशासनमा सबै प्रमाण पुग्ने र सेवाग्राही जिल्ला प्रशासन पुग्ने बित्तिकै नागरिकता प्राप्त हुनेछ ।

जिल्ला प्रशासन कार्यालयका प्रशासकीय अधिकृत ऋषि उपाध्यायले अनलाइनमार्फत नागरिकताको सिफारिस गर्दा नागरिकता सिफारिसमा हुने गलत क्रियाकलाप नियन्त्रण हुने, सेवाग्राहीलाई झन्झट नहुने र कर्मचारीलाई पनि काम गर्न सजिलो हुने बताए । उनले जिल्लाका ११ स्थानीय तहका ९० वडा बाट कार्तिक सम्म सेवा सुचारु गरिसक्ने बताए । उनले भने अनलाइन बाट नागरिकताको सिफारिसको व्यवस्था मिलाउनका लागी ११ वटै स्थानीय तहका सूचना प्रविधि अधिकृतलाई जिल्ला प्रशासन कार्यालय दैलेखको आयोजना र नारायण नगरपालिकाको समन्वयमा उक्त तालीम प्रदान गरिएको छ ।

अनलाइन मार्फत नागरिकता सिफारिस सम्बन्धी तालीममा बोल्दै नारायण नगरपालिका दैलेखका नगर प्रमुख लोमन शर्माले नारायण नगरपालिका सबै वडामा इन्टरनेटको व्यवस्थाका लागी नेपाल टेलिकमको प्रादेशिक कार्यालय सुर्खेत सँग समन्वय भइरहेको र वडामा आवश्यक पर्ने उपकरणको समेत व्यवस्था गर्न आवश्यक बजेट विनियोजन भएको बताए । उनले तत्काल नारायण नगरपालिकाका ११ वटा वडा मध्ये ८ वडा बाट अनलाइन मार्फत नागरिकता सिफारिस हुने बताए ।