दशौं राष्ट्रिय खेलकुदको मिति तोक्न मुख्यमन्त्रीको कडेलको आग्रह

सुर्खेत :   कर्णाली प्रदेशका मुख्यमन्त्री यामलाल कँडेलले प्रदेश सरकारका कारणले दशौं राष्ट्रिय खेलकुद प्रतियोगिता प्रभावित नहुने भएकोले अब नसर्ने गरि मिति तोक्न संघीय सरकारलाई आग्रह गरेका छन् ।
दशौ राष्ट्रिय खेलकुदको सम्बन्धमा परामर्श गर्न विहीबार सुर्खेत पुगेका युवा तथा खेलकुदमन्त्री तेजुलाल चौधरीसंगको छलफलमा मु्ख्यमन्त्री कँडेलले पटक पटक मिति तोक्ने तर खेलकुद नहुने हुँदा त्यसले नकारात्मक सन्देश गएकोले अब त्यस्तो गल्ती नदोहो¥याउन सुझाव दिए ।

कर्णालीमा हुने खेलकुद प्रतियोगिताको सञ्चालन तथा व्यवस्थापनका सम्बन्धमा सबै प्रकारको भूमिका निर्वाह गर्न प्रदेश सरकार प्रतिवद्ध रहेको उनले बताए । ‘हाम्रो तर्फबाट हामी प्रतिबद्व छौ र त्यही अनुसार तयारी पनि गरिरहेका छौ तर आयोजक तपाइँहरू हो, अब पनि मिति तोक्दै खेल नहुने हो भने अहिले नै विचार गरेर मिति तोक्नुहोला, उनले भने, ‘मिति तोक्दा संघ र प्रदेशको प्रष्ट जिम्मेवारी खुलाउनुहोला ।’

मुख्यमन्त्री कँडेलले प्रतियोगिता आयोजना गर्ने नाममा यस अघि भएका कमजोरी दोहोरिन नदिने तर्फ अहिलेदेखि नै सचेत हुनुपर्ने बताए । साथै उनले प्रतियोगिता गर्न यस अघि गठन गरिएका उपसमितिप्रति असन्तुष्टि जनाए । प्रदेशमा उपलब्ध नभएका जनशक्तिमात्र बाहिरबाट ल्याउन र जम्बो उपसमिति गठन नगर्न उनको सुझाव थियो । मुख्यमन्त्री कँडेलले प्रधानमन्त्री केपी शर्मा ओलीले राष्ट्रिय खेलकुद आयोजनाको सन्दर्भमा चासो सहित केहि दिन सरोकारवालालाई समेत निर्देशन दिएकोमा त्यसतर्फ ध्यान दिन खेलकुदमन्त्री चौधरीसमक्ष आग्रह गरे । ‘केही दिन अघि तपाइँहरूलाई प्रधानमन्त्रीज्यूले समेत प्रतियोगिताको मिति नसर्ने गरि काम गर्नुस भनेर निर्देशन दिनुभएको रहेछ, हाम्रो स्प्रिड पनि त्यही हो’, उनले भने ।

मुख्यमन्त्री कँडेलले प्रतियोगिता आयोजना गर्ने तर्फ प्रदेश सरकारको पुरै ध्यान केन्द्रित भएकाले प्रदेश खेलकुद परिषदका रिक्त पदहरूमा नियुक्त गर्न छलफल शुरू भएको तथा रंगशाला लगायत बाँकी पूर्वाधार निर्माणका काम तत्कालै अघि बढाइने बताए । राष्ट्रिय खेलकुद प्रतियोगिताका सबै पूर्वाधार आयोजक संघीय सरकारले नै निर्माण गर्ने भएपनि दशौ खेलकुदका अधिकांश खेलका लागि कर्णाली प्रदेश सरकारले पू्र्वाधार निर्माण गरेको बताउँदै मुख्यमन्त्री कँडेलले थप पूर्वाधार बनाउन संघीय सरकारले सहजीकरण गर्नु पर्ने धारणा राखे । युवा तथा खेलकुदमन्त्री चौधरीले प्रतियोगिताका लागि अब मिति नसर्ने गरि तयारी भइरहेकाले त्यसमा ढुक्क हुन आग्रह गरे । छलफलमा कर्णाली प्रदेशका आर्थिक मामिलामन्त्री राजीवबिक्रम शाह, सामाजिक विकासमन्त्री घनश्याम भण्डारी लगायतको उपस्थिति थियो ।