२–१ गोलले हराउँदै कर्णालीका निजामति विजयी

सुर्खेत  :   नेपाल निजामति कर्मचारी संगठन सुर्खेतलाई हराउँदै नेपाल निजामति कर्मचारी संगठन कर्णाली प्रदेश विजयी भएको छ । निजामती क्षेत्रका शहीद मनोज–झपेन्द्र–सुरेन्द्र स्मृति दिवस,२०८२ को अवसरमा सप्ताहव्यापी कार्यक्रम अन्तर्गत आज सुर्खेतको वीरेन्द्रनगरमा भएको मैत्रीपूर्ण फुटवलमा नेपाल निजामती कर्मचारी संगठन सुर्खेतलाई २–१ गोलले हराउँदै नेपाल निजामती कर्मचारी संगठन कर्णाली प्रदेश विजयी भएको हो ।

नेकपा एमाले सुर्खेतका अध्यक्ष कुलमणि देवकोटाले कर्मचारी–कर्मचारीबीच सौहार्दपूर्ण सम्बन्ध कायम गराउनमा मैत्रीपूर्ण खेलले सहयोग पुग्ने बताए । उनले मैत्रीपूर्ण फुटबलले संगठनमा एकमनका साथ काम गर्ने प्रेरणा जगाउने बताए । नेपाल निजामति कर्मचारी संगठन सुर्खेतका अध्यक्ष सीता कँडेलले मनोज–झपेन्द्र–सुरेन्द्र स्मृति दिवस,२०८२ को अवसरमा सप्ताहव्यापी कार्यक्रम अन्तर्गत मैत्रीपूर्ण खेलको आयोजना गरिएको बताइन । उनले खेलमा कसैको जित वा हारको रुपमा लिनेगरी नभई कर्मचारी–कर्मचारी वीच असल सम्बन्ध कायम गर्न प्रेरित रहेको जनाईन् ।

विजयी खेलाडीलाई निजामति कर्मचारी संगठनका कर्णाली प्रदेश सह–इन्चार्ज टंक लामिछाने, अनुशासन आयोगका सचिव शंकर भट्टराई, नेपाल निजामति कर्मचारी संगठन युवा तथा खेलकुद विभाग सचिव हेमन्त चुनारा, कर्णाली प्रदेश अध्यक्ष राजेश आचार्य, उपाध्यक्ष राजेन्द्र पोखरेल र महासचिव प्रकाश शर्मा अधिकारी लगायतले बधाई तथा शुभकामना व्यक्त गरेका थिए ।