भूमिहीन दलित, सुकुम्बासीलगायतलाई जग्गाधनी पुर्जा वितरण

सुर्खेत :   नेपाली कांग्रेसका उपसभापति पूर्णबहादुर खड्काले आफ्नो निर्वाचन क्षेत्रमा भूमिहीन दलित, सुकुम्बासी र अव्यवस्थित बसोबासीलाई जग्गाधनी पुर्जा वितरण सुरू गरेका छन ।

भूमि समस्या समाधान आयोग जिल्ला समिति सुर्खेतद्वारा शुक्रवार आयोजित कार्यक्रममा उपसभापति खड्काले लेकवेशी र भेरीगंगा नगरपालिकाका दुई ४७ जनालाई जग्गाधनी पुर्जा वितरण गरेका हुन । पुर्जा वितरण कार्यक्रममा उपसभापति खड्काले वर्तमान सरकारले मुलुकमा राजनीतिक स्थायित्व कायम गर्दै जनताका समस्या समाधानमा ध्यान केन्द्रित गरेको उल्लेख गरे ।

पूर्व उपप्रधानमन्त्रीसमेत रहेका खड्काले भूमिसम्बन्धी सबै समस्याको समाधानका लागि चाँडै भूमि विधेयक पारित गर्ने गरी छलफल चलिरहेको जानकारी दिए । उनले भूमिको अधिकतम उपयोग गर्ने, विशेष गरी व्यावसायिक खेती गरेर आर्थिक समृद्धिको मार्गमा अग्रसर हुन आवश्यक भएकोमा जोड दिए ।