मुख्यमन्त्री कँडेल गरे मन्त्री र सचिव संग कार्यसम्पादन सम्झौता

सुर्खेत :  कर्णाली प्रदेशका मुख्यमन्त्री यामलाल कँडेलले प्रदेश सरकारको बजेट प्रभावकारी रूपमा खर्च गर्ने उद्देश्यले मन्त्री सँगै कार्यसम्पादन सम्झौता गरेका छन् ।बिहीबार मुख्यमन्त्री तथा मन्त्रिपरिषद्को कार्यालयमा आयोजित कार्यक्रममा मुख्यमन्त्री कँडेल, मन्त्रीहरू र प्रमुख सचिवबीच सम्झौता भएको हो।

आर्थिक वर्ष सुरु भएको पहिलो दिनमै यस्तो सम्झौता गरिएको हो। मुख्यमन्त्री कँडेलले मन्त्रालयहरूले आफ्नो जिम्मेवारी प्रभावकारी रूपमा पूरा गर्नुपर्ने भन्दै वार्षिक कार्ययोजना बनाएर काम गर्न निर्देशन दिएका छन् ।

कार्यक्रममा आर्थिक मामिला तथा योजना मन्त्री राजीवविक्रम शाह, कृषि तथा सहकारी मन्त्री विनोदकुमार शाह, पूर्वाधार मन्त्री शेरबहादुर बुढा, सामाजिक विकासमन्त्री घनश्याम भण्डारी, पर्यटन तथा वातावरण मन्त्री सुरेशकुमार अधिकारी र प्रमुख सचिव वीरेन्द्रकुमार यादवले सम्झौतामा हस्ताक्षर गरेका छन् ।

मुख्यमन्त्री कँडेलले अब हरेक मन्त्रालयले सम्झौताअनुसार काम गर्नुपर्ने बताएका छन् । उनका अनुसार अब कामको मूल्याङ्कन पनि गरिनेछ।