गायिका हरिमायाको तीज गीत मधु सार्वजनिक

सुर्खेत  :   राष्ट्रिय लोक तथा दोहोरी गीतप्रतिष्ठान कर्णाली प्रदेशकी अध्यक्ष गायिका हरिमाया कार्कीको तीज गीत मधु सार्वजनिक गरिएको छ । शुक्रबार हरिमाया कार्की अफिसियल युट्युव च्यानलबाट गीत सार्वजनिक गरिएको हो ।
हरिमाया कार्कीको एकल स्वरमा रहेको मधुमा संगीत र शब्द रचना पनि गायिका कार्कीले आफै गरेकी हुन् । खेमराज गौतमले संगीत एरेन्ज गरेको उक्त गित मालाश्री डिजिटल रेकर्डिङ स्टुडियोमा रेकर्ड गरिएको हो । गीतको भिडियोमा समिक्षा सुनार, जानकी पुन, यामनारायण आचार्य, सिर्जना ठकुराठी, चित्रकला खत्री, हरिमाया कार्की, अनमिन जिसी, पावल बलामी मगरलगायतका कलाकारहरुले अभिनय गरेका छन् ।

गीतको भिडियो सुर्खेतका विभिन्न पर्यटकीय स्थानमा छायाङ्कन गरिएको छ । निर्मल प्याकुरेले निर्देशन र सम्पादन गरेको उक्त भिडियोमा चन्द मन्दिर र हेमन्त नेपालीले नृत्य निर्देशन गरेका छन् । नेपाली हिन्दु महिलाहरुको जीवन भोगाई र अनुभुतीको समेटेर उक्त गित बजारमा ल्याएको गायिका कार्कीको भनाइछ ।

दुई दशक लामो समय लोक तथा दोहोरी गीतको क्षेत्रमा अनवरत लागेकी कार्की तीज गीतलाई समयानुकल परिवेशमा परिस्कृत गर्नु पर्ने धारणा राख्छिन् । तीज गीत समाज परिवर्तन, नारी सिर्जनशिलता र सकारात्मक सन्देश दिने खालका हुनु पर्ने भनाइछ ।

भिडियो हेर्न यहाँ क्लिक गर्नुहोस ।