शुक्रबारदेखि कर्णाली राजमार्ग अवरुद्ध

दैलेख  :  शुक्रबार साँझबाट बन्द भएको कर्णाली राजमार्ग अहिलेसम्म खुल्न सकेको छैन । हुम्लाबाट नेपालगञ्ज जाँदै गरेको भे १ ख ३५१८ नम्बरको ट्रकले दैलेखेको सिम भन्ने ठाउँमा ठक्कर दिँदा दैलेख आठबिस नगरपालिका–४ का ५५ वर्षीय तिलक माझिको मृत्यु भएपछि स्थानीयले कर्णाली राजमार्ग बन्द गरेका थिए । शुक्रबार ६ः१५ बजेबाट बन्द भएको कर्णाली राजमार्ग नखुल्दा हजारौँ यात्रु अलपत्र परेका छन् ।

दैलेख प्रहरी प्रमुख डिएसपी भुवनेश्वरप्रसाद यादवले स्थानीयको आक्रोश बढिरहेकाले सुरक्षा अवस्थामा समेत चुनौती रहेको भन्दै स्थानीय जनप्रतिनिधिसँग छलफलपछि समस्याको समाधान गराउने प्रयास जारी रहेको भए पनि सफल हुन नसकेको जानकारी दिए । कर्णाली राजमार्ग जस्तो क्षेत्र १८ घण्टासम्म अवरोध हुँदा प्रहरी प्रशासनले चासो नदिएको भन्दै सर्वत्र विरोध हुन थालेको छ ।