कांग्रेसले बोलायो केन्द्रीय कार्यसमिति बैठक

काठमाडौँ  :  नेपाली कांग्रेसले यही पुस २२ गतेका लागि केन्द्रीय कार्यसमिति बैठक बोलाएको छ। नेपाली कांग्रेस पार्टी कार्यालयका मुख्यसचिव  कृष्णप्रसाद पौडेलले मंगलबार विज्ञप्ति जारी गरी पुस २२ गते दिउँसो १ः०० बजेका लागि केन्द्रीय कार्यसमिति बैठक बोलाएको जानकारी गराएका छन्।

मुख्यसचिव पौडेलका अनुसार बैठकमा मंसिर ४ गते सम्पन्न प्रतिनिधि सभा र प्रदेश सभा निर्वाचनको समीक्षा, समसामयिक राजनीतिक सन्दर्भबारे छलफल हुनेछ। एमालेलगायतका दलहरुको साथ लिएर माओवादी केन्द्रका अध्यक्ष पुष्पकमल दाहाल प्रचण्ड प्रधानमन्त्री बनेसँगै कांग्रेसभित्र नेतृत्वप्रति तीव्र असन्तुष्टि दिएको छ। कतिपय नेताहरुले सभापति शेरबहादुर देउवाले राजीनामा दिनुपर्ने मागसमेत गरिरहेका छन्।

संसदमा कांग्रेस ८९ सांसदसहित पहिलो दल बने पनि नेतृत्व रणनीतिक रुपमा असफल हुँदा कांग्रेसले केन्द्रदेखि प्रदेशसम्म प्रतिपक्षमा बस्नुपर्ने अवस्था आएको भन्दै सभापति देउवाको आलोचना भइरहेको छ। यससँगै देउवा पार्टीभित्र रक्षात्मक अवस्थामा पुगेका छन्। पार्टीभित्र नेतृत्वविरुद्ध असन्तुष्टि चुलिएका बेला कांग्रेसले केन्द्रीय कार्यसमिति बैठक बोलाएको हो।