बिमा समितिको प्रादेशिक कार्यालय स्थापना

सुर्खेत  :   सुर्खेतमा बिमा समितिको प्रादेशिक कार्यालयको स्थापना गरिएको छ । अर्थमन्त्री जनार्दन शर्माले बीमा समितिको कर्णाली प्रदेश कार्यालय उद्घाटन गरेका छन् । समितिले गत असार एक गतेदेखि नै कार्यालय सञ्चालनमा ल्याएतापनि औपचारिक रूपमा भने बिहीवारदेखि शुभारम्भ भएको छ ।

कार्यक्रममा बोल्दै अर्थमन्त्री शर्माले बीमा कम्पनीहरू सहर केन्द्रित भएको भन्दै यसलाई दुरदराजसम्म विस्तार गर्नुपर्नेमा जोड दिए । क्षति न्यूनीकरण गर्न बीमाको सुरुवात भएको भन्दै सरकारले यसलाई व्यवस्थित गर्ने योजना अघि सारेको शर्माले बताए । प्रदेश कार्यालयलाई धेरै अधिकार दिएकोले अब कर्णाली प्रदेशमा पनि बीमा समितिले महत्वपूर्ण भूमिका खेल्ने अपेक्षा लिइएको उनको भनाइ थियो ।

कार्यक्रममा बीमा समितिका अध्यक्ष सूर्यप्रसाद सिलवाल, कार्यकारी निर्देशक राजुरमण पौडेल, निर्देशक दिनेश लाल कर्ण नेपाल बीमक संघका अध्यक्ष चंकी क्षेत्री लगायतको उपस्थिति थियो । समितिले एकै पटक तीन वटा प्रादेशिक कार्यालयको स्थापना गरेको छ । जसमध्ये औपचारिक रूपमा पहिलो उद्घाटन कर्णाली प्रदेशमा गरिएको हो ।