महिलालाई वडाध्यक्ष बनाउन कन्जुस्याइँ

दैलेख  :  जिल्लाका ११ स्थानीय तहका ९० वडा रहेको दैलेखमा जिल्लाका प्रमुख पार्टीले वडा अध्यक्षको उम्मेदवार बनाउन कन्जुस्याइँ गरेका छन् । जिल्लामा रहेका प्रमुख पार्टी नेकपा(एमाले) र माओवादी केन्द्रले,राप्रपा नेपाल र एकीकृत समाजवादी पार्टीले केही वडामा उम्मेदवार बनाए पनि नेपाली काँग्रेसले भने कुनै पनि वडामा महिला वडाध्यक्षको उम्मेदवार बनाएको छैन ।

नेकपा एमालेले जिल्लाको भैरवी गाउँपालिका –२ दुईको वडा अध्यक्षमा विमला थापा र भगवतिमाई गाउँपालिका–६ को वडाध्यक्षमा खगिसरा बुढालाई उम्मेदवार बनाएको छ भने माओवादी केन्द्रले ठाटिकाँध गाउँपालिका –१ को वडाध्यक्षमा जगत् कुमारी रावललाई उम्मेदवार बनाएको छ ।

नेकपा (एमाले)का अध्यक्ष रवीन्द्र शर्माले एक गाउँपालिका प्रमुख र दुई वडामा महिला अध्यक्षको उम्मेदवार बनाएको बताए । उनले ठाटिकाँध गाउँपालिकाको अध्यक्षमा लक्ष्मीदेवी शाह,भगवतिमाई गाउँपालिका–६ को वडा अध्यक्षमा खगिसरा बुढा र भैरवी गाउँपालिका–२ को वडाध्यक्षमा विमला थापालाई उम्मेदवार बनाएको बताए । उनले भने वडा अध्यक्षमा महिला आंकाक्षी कम भएका कारण पनि उम्मेदवार कम बनाइएको हो ।
नेपाली काँग्रेसका पार्टी सभापति मणिराम रेग्मीले दुई पालिकाको प्रमुख र अन्य पालिकाको उपप्रमुख तथा उपाध्यक्षमा महिलालाई टिकट दिइएको बताउँदै वडाध्यक्षमा महिलालाई उम्मेदवार बनाउन नसकिएको बताए । उनले जिल्लाको नारायण नगरपालिका प्रमुखमा निर्मला थापा खड्का र भैरवी गाउँपालिकाको प्रमुखमा रिता शाही र उप प्रमुखमा देवी भण्डारीलाई उम्मेदवार बनाएको बताए ।

राप्रपा नेपालले भने चार वडामा महिला वडाध्यक्षको उम्मेदवार बनाएको छ । नारायण नगरपालिकाका –५,९,११ र दुल्लु नगरपालिका–४ मा उम्मेदवार बनाएको हो । राप्रपा नेपाल दैलेखका उपाध्यक्ष रणबहादुर सिंहले नारायण नगरपालिका –५ मा पार्वती कुमारी कटुवाल, वडा –९ मा पूजा थापा वडा –११ मा मिनादेवी शाही र दुल्लु नगरपालिका–४ मा शोभा कुमारी शाहीलाई उम्मेदवार बनाएको बताए । उनले अन्य पालिका उप प्रमुखमा उम्मेदवार बनाएको प्रमुखमा उम्मेदवार नबनाएको बताए । एकीकृत समाजवादी पार्टीले ९० वडा मध्ये नारायण नगरपालिका –११ को वडा अध्यक्षमा मन कुमारी सुनारलाई मात्र उम्मेदवार बनाएको छ ।

जिल्ला निर्वाचन कार्यालय दैलेखका सूचना अधिकृत विवेक पुरीले जिल्लाका ११ पालिकाका ९० वडा मध्ये विभिन्न पार्टी बाट छ जना महिलाको मात्र वडा अध्यक्षमा उम्मेदवारी परेको जानकारी दिए ।

महिला अधिकारकर्मी सुनिता चन्दले महिलाको अर्थपूर्ण सहभागिता नभएको बताइन । उनले ९० वडामध्ये एक तिहाइ वडामा महिला वडाध्यक्ष उम्मेदवार उठाउनु पर्ने भए पनि राजनैतिक दलले महिलाहरूलाई प्रयोग मात्र गर्ने गरेको आरोप लगाइन ।