एमालेको देशैभरका पालिकाकाे अधिवेशन सुरु

काठमाडौं  :  प्रमुख प्रतिपक्षी दल नेकपा एमालेको देशैभरका सात सय ५३ वटा पालिकाहरुमा मङ्गलबार एकसाथ अधिवेशन सुरु भएको छ । एमाले केन्द्रीय कार्यालयको वार रुमबाट पार्टी अध्यक्ष केपी शर्मा ओलीले पालिका अधिवेशनको भर्चुअल माध्यममार्फत औपचारिक उद्घाटन गरेका हुन ।एमाले अध्यक्ष ओलीले देशैभरका सबै पालिका र विशेष इलाकाहरुको अधिवेशन उद्घाटन भएको उद्घोष गरेका थिए ।

एमालेले आगामी मङ्सिर १० देखि १२ गतेसम्म दशौं राष्ट्रिय महाधिवेशन चितवनमा आयोजना गर्दैछ । जस अनुरुप यसअघि कात्तिक ६ गते एमालको छ हजारभन्दा बढी वडाहरुमा अधिवेशन सम्पन्न भइसकेका छन् । एमालेको देशैभरको वडा अधिवेशनमा सर्वसम्मतबाट नेतृत्व चयन भएको थियो ।

एमाले विधान अनुसार गाउँपालिका र नगरपालिका बढीमा ७५ सदस्यीय कमिटी गठन गरिने व्यवस्था छ । यसैगरी, उपमहानगरपालिकामा ८५ र महानगरमा १०१ सदस्यीय पार्टी कमिटी गठन हुने व्यवस्था छ ।